[Tuğra] Mahmud Han bin Abdülhamid Han el-muzaffer daime

Emirü’l-ümerai’l-kiram kebirü’l-küberai’l-fiham zü’l-kadri ve’l-ihtiram sahibü’l-ızz-i ve’l-ihtişam el-muhtac bin mezid-i inayeti’l-meliki’l-a‘la hâlâ Ergani ve Keban madenleri emini Ahmed Paşa -dame ikbalühü- ve kıdvetü’l-kudat ve’l-hükkâm mademü’l-fazl ve’l-kelam Mevlana Harput kadısı zide fazluhu tevkî‘-i refi‘-i hümayun vasıl olıcak malum ola ki Van Kalesi muhafazasına memur ocaklı neferatının mevacib ve maaşları için Harput eyaletinden tahsis olunup be her sene ba ferman-ı âlî-şân neferat-ı merkume taraflarından Keban madenleri eminleri uhdesine ihraz olunagelen kurâ ve mezâride İçme Karyesi dahilinde olan Manzuroğlu demekle maruf mezra‘a mülkiyet şurutu üzere müteveffa Abdi Paşa’nın oğulları müderrisin-i kiramdan İbrahim Bey ve Nuri Osman Bey ve Süleyman Bey zide ilmuhumun uhdelerinde olup Palu Sancağında nehr-i Fırata Keban madeninin sîm fırınları için sevk olunagelen gümrük nakline memur Ahur? karyesinden Kelpçilerinin? ücretleri mukabilinde maden-i hümayun hazinesinden itası mutad ve mukarrer olan yedi yüz elli guruş muma-ileyhim taraflarından maden-i hümayun ümenası taraflarından ita ve ümena taraflarından dahi sabikü’z-zikr Kilkçiyan? eda olunmak şartıyla nef‘an bi’l-maden ve rahmen lilfukara maktuiyyet vechiyle mir-i muma-ileyhimin ferman-ı âlî-şânımla uhde-i mülk ve tasarruflarında iken mezra‘a-i mezbureyi Harput ağavatından Çötelizade? el-Hac Mehmed zide kadruhuya iki yüz yirmi beş senesinde malumul-mikdar muaccele ile bey‘ ve furuht ve ferağ ve kasr-ı yed ile yedlerinde olan bir kıt‘a emr-i âlî-şânım ve muma-ileyh dahi ber-vech-i maktuiyyet be-her sene yedi yüz elli guruş meadin-i humayun hazinesinden tediye ve teslim eylemek şartıyla kabul edip el-yevm uhdesinde iken ber-vech-i maktuiyyet be-her sene meadin-i humayunum hazinesine verilegelen yedi yüz elli guruşu ber-vefk-ı karar tediye ve teslim eylemek şartıyla muma-ileyhimin sulbü sahih oğulları Hacı Ahmed ve İsmail’e kasr-ı yed ve ferağ ve yedinde olan emr-i şerifi teslim eylediğinde mezra‘a-i merkumeyi muma-ileyhimanın zabtı için inayet-i emr-i âlî-şân battalda hıfz ve müceddeden bir kıt‘a emr-i şerifim ısdarı hususunu sen ki emir-i muma-ileyhsin bir defa tarafından varid olan bir kıt‘a arizanda tahrir ve inha ve olbabda Harput kadısı verdiği ilamı takdim eylemişsin hazine-i amiremde mahfuz baş muhasebe defterlerine nazar olundukda mezra‘a-i merkume muteveffa-yı muşarun-ileyhin oğulları muma-ileyhimanın uhdelerinde olub     zarfı için emr-i şerifim verildiği der-kenarda nümayan olmağla iktizası muteberan-ı ricali devlet-i aliyyemden darbhane-i  amire nazırı iftiharü’l-emacid ve’l-ekarim es-Seyyid İbrahim Sarim dame mecduhudan isti‘lam olundukda mezra‘a-i merkume muma-ileyhimin kasr-ı yedinden oğulları Hacı Ahmed ve İsmail zabtı için emr-i şerifim suduruna memhuren ilamı mucebince zikr olunan mezari‘in mutasarrıfı kasr-ı yedinden oğulları muma-ileyhimanın tasarrufları için baş muhasebeye kayd ile emr-i şerifim verilmek babında iftiharü’l-ümera ve’l-ekarim bilfiil rikab-ı hümayunum defterdarı mir Mehmed Rauf dame uluvvühü telhis etmekle imdi telhisim mucebince amel olunmak babında ferman-ı âlî-şânım sadır olmuştur buyurdum ki hükm-i şerifim vardıkda bu babda sadır olan emrim üzere amel edip dahi nazır-ı muma-ileyhin ilamı mucebince mezra‘a-i mezkureyi babaları merhumun kasr-ı yedinden oğulları muma-ileyhimaya zabt u rabt ettirdib mugayir-i emr-i âlî-şânım zabt ve tasarruflarına taraf-ı ahardan müdahale ve taarruz ettirmeyesin ve sen ki kadî-i muma-ileyhsin sen dahi muceb-i emr-i şerifimle amel ve hareket eyleyesin şöyle bilesin alamet-i şerife itimat kılasın
Tahriran fi’l-yevmi’l-ışrîn min recebi’l-ferd sene seb‘a ve ışrîn ve mieteyn be-mahruse-i Kostantiniyye