Uhbirtu kema fihi

İsmail kassamü’l-askeri bi-dari’s-Saltanatı’s-Seniyye nemmekahu’l-fakir ileyhi azze şanuhu gufira leh

Mühür

Husus-i atil beyanın mahallinde ketb u tahriri için savb-ı şer‘-i enverden Mevlana Müftîzade el Hac Mehmed Efendi irsal olunup ol dahi mahmiye-i İslambol’da Sultan Mehmet Han aleyhir rahmetü vel gufran hazretlerinin cami-i şerifi kurbünde Mustafa Bey? mahallesinde sakin iken bundan akdem vefat eden sabıka İslambol ağasızade Ahmet Ağa ibn Mustafanın menziline varıp zeyl-i kitabda muharrerül esami müslimin huzurlarında akd-i meclis-i şer‘-i şerif ettikde müteveffa-yı mezburun veraseti zevce-i menkuha-i metrukesi Şerife Habibe Hanım ibnetehu sabıka şıkk-ı evvel defterdarı umdetül eâli vel ızâm müstecmiü’l-mehasin vel mekarim izzetlü Rakım el Hac Mehmed Efendi hazretleri ile sabıyy-i kebiroğlu fahrül müderrisinil kiram Şerif Numan Efendi ve sulbiye kebire kızı Şerife Amine Hanıma münhasıra olduğu şer‘an zahir olduktan sonra muma-ileyha Şerife Habibe Hanım tarafından vekil-i sabitül vekalesi Hammami Hasan Ağa ibn Abdullah ve muma-ileyh Şerif Numan Efendi meclis-i makud-ı mezkurda iş bu kitab-ı sıhhat-nisabın sahibesi muma-ileyha Şerife Emine Hanımın zevci ve tarafından kezalik vekil-i müsecceli umdetül akran Ali Efendi ibn Ömer mahzarında her biri bil asale ve bil vekale ikrar ve takrir-i kelam edip merhum-ı mezburun ilel vefat yedinde mülk ve hakkı idiği müsbet olup işbu derununda akd-i meclis olunan lede’l-ahali ve’l-ceyeran malumul hudud vel müştemilat malumul mikdar mahallinin arsası mukataalı ebniyesi mülk ve ma-adasının arsası sarf-ı vakf bir bab kebir menzilden muma-ileyha Şerife Emine Hanımın hisse-i … hariciye menzilden bi’t-terazi ifraz ve tayin eylediğimiz bir taraftan muma-ileyha Şerife Habibe Hanım için ifraz ve tayin olunan mahal ve bir taraftan muma-ileyh Şerif Numan Efendi için müfriz-i mahal ve bir taraftan bazen tarik-i hâs bazen kileri el hac Mehmet Emin Ağa ve bazen medrese-i … ve bir taraftan tarik-i âm ile mahdud fevkânî iki bab oda ve bir sofa ve bir camlı sağir köşk ve bir kahve odası ve tahtında üç bab oda ve bir kiler ve iki kenif ve bir ahur ve bi’r-i mâ ve bir miktar havlu ve tarik-i has tarafında bir miktar bahçeyi müştemil tûlen ve arzan bi-hesab-ı terbî‘î dokuz yüz yetmiş beş buçuk zira‘ mahallin bina olan mahal mukataalı bahçe olan mahal vakıf olmak üzere ifraz ve ta’yin ve alamat-ı fasıla vaz‘ıyla mümtaz kılınıp menzil-i mezkurun derununda cari olan üç buçuk ... tebei’yet ile mülk-i mâ-i lezizin üç çuvaldızını dahi … müvekkile-i muma-ileyha Şerife Amine Hanım hissesi içün kezalik bitterazi ifraz ve tayin olunup zikr olunan dokuz yüz yetmiş beş buçuk zira mahal-i müfrez üç çuvaldız mâ-i carîlerinde bizim ve müvekkile-i muma-ileyha Şerife Habibe Hanımın alaka ve medhallerimiz kalmayıp müvekkile-i muma-ileyha Şerife Amine Hanımın müstekılleten mülkü olmuştur keyfe ma teşa ve tahtaru mutasarrıfa olup ve müvekkile-i muma-ileyha Şerife Amine Hanım için ifraz ve tayin ve alamat-ı fasıla vaz‘ıyla mümtaz kılınan mahallin gabn ve ta‘rir ve ziyah ve noksan davasına müteallika âmme-i de‘âvi ve mutalebat ve kaffe-i iman ve muhasımattan müvekkile-i muma-ileyha Şerife Amine Hanımın ve vekil-i muma-ileyh Ali Efendinin zimmetlerini her birimiz bil asale ve bil vekale ibra-i âm rafiu’l hisam ile ibra ve iskat eylediğimizde vekil-i muma-ileyh Ali Efendi dahi ma-‘ada menzili mezkura ve mâ-i cârî-i mezkura müteallika âmme-i davadan bil vekale bizim ve müvekkile-i muma-ileyha Şerife Habibe Hanımın zimmetini ibra ve her birimiz aharın ibrasını kabul eyledik dediklerinde gıbbe’t-tasdiki’ş-şer‘î vaki hali Mevlana-yı mezbur mahallesinde tahrir ve ma’an ………… çukadar Arabgir Mustafa Ağa ve mahzar el-hac Salih Ağa ile meclis-i şer‘e gelip ala vukuihi inha ve tağrir etmeğin ma vaka‘a bittaleb ketb olundu. Fi selh-i muharremül haram sene tis‘a ve seb‘in ve miete ve elf.

Şuhûdü’l-hâl: eş Şeyh Mustafa Efendi, Mimar halifesi Mustafa Ağa, Mimar halifesi Hasan Efendi, Hoca Mustafa Efendi, Çavuşzade Mustafa Mehmet Ağa, Lütfullah Mehmet Ağa ve gayrihim.