Ma fihi min vakfi’n-nükud ve’ş-şurut sebete ındî ale’l-vechi’l-mebsut fe hakemtü bi sıhhatihi ve lüzumihi fi hususihi ve umumihi alimen bi’l-hilaf beyne’l-eimmeti’l-israf fi beyani’l-evkafi ve ene’l-fakru ilellahi’l-ahad Vardarî Şeyhzade Mehmed el-Kadî bi mahruse-i Selanik gufira lehüma

Elhamdülillahi rabbil alemin essalatu vesselamu ala seyyidina muhammedin ve alihi ve sahbihi ecmain emma-ba‘d işbu sahife-i sıhhat-nisabın tahrir ve tasdirine bais ve badi mahmiye-i Selanik anil ifat vel mehalik mahallatından ahmet subaşı mahallesi sakinelerinden fahrül … ismetlü şerife hamide hanım ibnetehül merhum kadir esseyyid numan paşa bu dar-ı fenanın esası paydar olmayıp “küllü men aleyha fan” hakikati vücuduna sirayet etmedin tertib-i hayrata talibe ve ta’yin-i hasenat mucibetül? mesubata rağibe olmağın vakf-ı atizzikri ikrara vekil olup vekaleti zatî? Muma-ileyhayı bil marifetiş şer‘iyye arifane esseyyid osman efendi ibnül merhum mustafa ağa ve ibrahim ağa ibn ali nam kimesneler şehadetleriyle sabit ve subut-ı vekaletine hükm-i şer‘î lahik olan umdetül ulema müsevvidüş-şeyh mustafa efendi ibnül merhum mahmut efendi meclis-i şer‘i şerif-i ahmedi ve mahfil-i din-i münif-i mustafaviyede? lieclittescil vel emrüt tekmil mütevelli nasb ve ta‘yin olunan fahr-ül akran esseyyid el hac ahmet efendi ibn mustafa mahzarında bil vekale ikrar-ı sahih-i şer‘î ve itiraf-ı sarih-i mer’î edip müvekkilem muma-ileyha şerife hamide hanım etyab-ı emval ve enfes-i menalden bin beş yüz kuruş ifraz ve kemal-i imtiyaz ile mümtaz edip hasbeten lillahi kerim ve ibtiğaen limerdatirrabbirrahim vakf u celes(cels) edip şöyle şart ve tayin eyledim ki meblağ-ı mezkur yed-i mütevelliyle be her sene onu ona bir buçuk hesabı üzre ala vechişşer‘î istirbah? ve istiğlal olunup hasıl olan ribh ve nemasından mahmiye-i mezkure eşrafından umdetül mevali sabıka medine-i …….? kadısı çavuşzade ahmet reşit efendinin ecdadının bina ve ihya olan kapu tekyesinde müceddeden bina ve ihyasına muvaffak oldukları cami‘-i şerife derunu cami‘-i şerifte kıraat olunmak üzre Kur’an-ı Kerim’den vaz‘ eylediğim otuz aded ecza-ı şerifeyi on beş nefer kimesne küllü üsbu’ yevm-i ahadda ba‘de salatiz zuhr tilavet edip ecza-i şerifeyi tilavete bed ettikleri hafta tilavet olunan hatm-i şerifin sevab-ı cemilin Habib-i Hüda ve Rasul-i Kibriya Muhammedenil Mustafa sallahu aleyhi ve sellem hazretlerinin ezvac-ı tahirat ve çehar yar-i güzin rıdvanullahi aleyhi ecmain hazeratının ruh-ı şeriflerine ihda edeler ve hefte-i saniyede tilavet olunan hatm-i şerifin sevabını benim ve taallukatımın ervahına ihda edip be her cüz-i şerife tayin eylediğim ikişer akçeden yevm dörder akçe vazifeye her biri mutasarrıf olalar ve ecr-i ihvanlardan bir kimesne noktacı? olup cüz-i vazifesinden fazla yevm üç akçe vazifeye mutasarrıf ola ve yevm bir akçeyle bir kimesne hafız ecza ola ve nema-i vakf-ı mezburdan yevmi bir akçe tamir-i ecza-i şerife içün yed-i mütevellîde hıfz olunup ledel iktiza tamir ve termim oluna ve her sene vakf-ı mezburun muhasebesi içün yevm bir akçe harc-ı muhasebe verile ve ecza hanların zabt ve tasarrufları mütevelli tezkiresiyle olup vali ve kadı arzı ile zabt olunmıya ve vakf-ı mezbure cami-i şerif banisi muma-ileyh  ahmet reşit efendi hazretleri mütevelli olup tağayyür ve tebdil ve nakz ve tahvili yedinde ola badehu efendi-i muma-ileyhin evladı ve evlad-ı evlad-ı evlad-ı zükûrunun erşedi mütevelli ola badehum evlad-ı inası ve evlad-ı evlad-ı evladının inasının erşedi batnen ba‘de batnin mütevelli olalar badehum efendi-i muma-ileyhin utekasının ekberi badehum utekasının evladı ve evlad-ı evlad-ı evladının zükuru ba‘dehum evlad-ı inası ve evlad-ı evlad-ı evladının erşedi kezalik batnen ba‘de batnin mütevelli olalar badehum kapu tekyesinde şeyh olan mütevelli ola yevmî yedi akçe cihet-i tevliyete mutasarrıf ola ve nema-i mezkurdan zikrolunan vezaif eda olunduktan sonra fazla nema vakf-ı mezbur asl-ı mali vakfa zam oluna deyu hatm-i kelam ve istîfa-i meram edip nukud-ı mevkufeyi mütevelli-i muma-ileyhe teslim ol dahi ber vech-i vakfiyet kabz u tesellüm eyledim dedi dedikde gıbbet tasdik-il muteber vekil-i muma-ileyh inan kelamını semt-i rücû‘a atfedip eimme-i selase tahrir -aleyhim rahmetül melikilkadir- katlarında vakf-ı nukud ve âna müteferri olan şurut ve kuyut sahih olmadığı ecilden meblağ-ı merkumu istirdad ederim dedikde mütevelli Reşid tedarük-i cevab-ı sedid edip fil hakika vakf-ı nukud-ı eimme-i selase hazeratı re’y-i hatarlarında batıl olup lakin hazreti İmam Züfer -aleyhi rahmetül ekberden- vakf-ı nukudun sıhhatini rivayet eden İmam Ensari -aleyhi rahmetül bari- kavli müftiye ve vakf dahi sahihdir binaenaleyh redden imtina etmekle vekil-i muma-ileyh tekrar cevaba tasaddi edip eğerçi rivayet-i mezbure üzre sahih ve salim olup ancak sıhhat lüzumu müstelzim olmamağın nukud-ı merkumeyi bana teslim … deyu her biri fasl ü hasma taliban olmalarıyla hakim-i mevkii sadr-ı kitab bi tevkî‘ihi’r-rafî‘il müstetab efendi hazretleri dahi canib-i vakfa nazar ve mübtil-i hayr olmaktan hazer edip ihtilafat-ı eimme-i eslafa sarf-ı himmet eylediği halde vakf-ı mezburun ve zımmında olan şurut ve kuyudun evvela sıhhatine ve saniyen lüzumuna ala re’yi men yerâhu hükmedip min-ba‘d vakf-ı nukud vakf-ı sahih müeyyed ve cels-i sahih muhalled oldu femen bedelehu ba’dema semia hu fe innema ismuhu allelezine mübeddilune hu innallahe semiun a’lim … zalike ve hurrire fil yevmis sadis aşar fi şehr-i rebiülevvel sene isneteyn ve mieteyn ve elf

Şuhûdü’l-hâl: umdetul ulema-il kiram me’zun bil ifta faziletlü mustafa efendi hazretleri, reisülküttab şerif ahmet efendi, esseyyid mehmet efendi el-katib, el hac mehmet ağa tabi-i müşarunileyh çavuşzade efendi ve gayrihim minel hazirin.